अमुल्य

हिलोभित्र उम्रिएका कमलका पातहरु,
टिप्नलाई लम्किएका कलकलाउँदा हातहरु ।

ठीक बेठीक नसोचेरै गरिएका छुल्याँइमा,
काँधमा हात राखिदिने दौंतरीका साथहरु ।

निगुरमुन्टी लगाएर कान समाई बस्नुपर्दा,
नैतिक शिक्षा पढाउने गुरुजीका बातहरु ।

झ्यालबाट सिरानीमा उज्यालोको धर्को खस्दा,
टोलाएरै काटिएका जुनेलीका रातहरु ।

उमंगका रंगहरुमा सम्झनामा पोतिएका,
मदिरालाई माथ गर्ने जवानीका मातहरु ।

हिलोभित्र उम्रिएका …